GHAZAL

GHAZAL
DR.AHMAD ALI BARQI AZMI
598/9, Zakir Nagar, Jamia Nagar
New Delhi-11025

Dard E Dil Apni Jagah Dard E Jigar Apni Jagah
Ashkbaari Kar Rahi Hai Chashm E Tar Apni Jagah
Sakit O samit Hain Donon Meri Haalat Dekh Kar
Aaina Apni Jagah Aainagar Apni Jagah
Baagh Mein Kaise Guzarein Pur Musarrat Zindagi
Baaghbaan Ka Khauf Aur Gulchin Ka Dar Apni Jagah
Meri Kashti Ki Rawaani Dekh kar Toofaan Mein
Pad Gayee Hai Sakht Chakkar Mein Bhanwar Apni jagah
Hai Ayaan Ashaar Se Mere Mera Soz E Duroon
Meri Aah E Aatashin Hai Be Asar Apni Jagah
Haal E Dil Kisko Sunayein Koi Sunta Hi Nahin
Apni Dhun Mein Hai Magan Woh Charahgar Apni Jagah
Ashkbaari Kaam Aayee Kuchh Na BARQI Hijr Mein
Sau Sifar Jode Nateeja Tha Sifar Apni Jagah